TARİXİ YADDAŞIMIZIN “KİRVƏLİK” YÜKÜ
Yazılı tarix dayazdan oxuyar, səthi
yazar. Dərinlərə varmaz.
Gerçəyə
yox, maraqlara xidmət edər. Bu səbəbdən dərindən oxuyan heç bir kəsi qane etməz.
Tarixi
yaddaş isə özündə zahirdə görünənləri deyil, dərinlərdə yatan gerçəkləri
yaşadar. Zaman-zaman üzə çıxan bu gerçəklər qırıq-qırıq, hissə-hissə,
epizod-epizod da olsa, özünü xalqın tarixi yaddaşında qoruyar. Bu səbəbdən də tarixi
yaddaş öz çiyinlərində yazılmayan tarixin gerçəklik yükünü daşıyar.
Azərbaycan
türkünün tarixi yaddaşında bu günədək özünü qoruyub-yaşatmış bir epizod var.
Kirvəlik adlanır. Bu günədək yalnız səthi araşdırılmış, tarixçəsinə varılmamış,
daha çox sünnət mərasimlərində yada düşən bir adətimiz kimi tanıyırıq Kirvəliyi.
Tarixçəsini isə unutmuşuq artıq. Yazılı tarixdə bunu aramaq da əbəsdir. Sadəcə
tarixi yaddaşımızın pıçıltılarından duyuruq ki, bu, bizlərə aid bir nəsnədir. Əski
bir gələnək, dostluğu, sədaqəti, qardaşlığı özündə barındıran bir adətdir.
Kirvəlik nə vaxtdan yol gəlir bu günümüzə?
Nədən
başlanıb bu kirvəlik?
Nə
deməkdir, mahiyyəti nədir?
Bu
adət sırf İslama, müsəlmanlığa aiddirsə, nə üçün quzey Azərbaycandan kənarda
heç bir müsəlman toplumunda bilinmir və tanınmır?
Nə
üçün oğul övladının “sünnət” mərasimində yada salıb əməl etdiyimiz bu adəti
zaman-zaman ermənilərə də aid ediblər?
“Sünnətsiz”
xaçpərəst erməninin bir müsəlman türkün öz oğlunu “sünnət” etdirməsinə nə dəxli
ola bilər?
Tarixi
yaddaşımızın “qum saatı” Kirvəliyin çıxış nöqtəsi kimi miladın VII əsrinin ortalarını
göstərməkdədir. Yer-məkan – quzey Azərbaycanın Ərsak (Qarabağ) bölgəsi. Qədim
dünyanın böyük bir güc mərkəzinin – pers Sasanilərin çökdüyü və İslam inancının
Qafqazlara gəlib-çıxdığı bir dönəm. Bölgə bir yandan Sasanilərin çöküşünü, digər
yandan Xəzərlərin yürüşlərini, o biri tərəfdən də yeni bir kimliyə bürünmüş
döşü xaçlı yunan Bizansının Qafqaza təsirlərini öz üzərində hiss etməkdədir. İsəvi
Alpanlar o vaxta kimi istilaçı “divin” inancı olan atəşpərəstliyə qürurla dirənmiş,
İsanın tək tanrıçı inancına sidq-ürəkdən söykənmiş durumdadırlar bu dövrdə. “Dindaşları”
sayılan, lakin soykökünə görə yad olan Bizansın riyakar davranışları Alpan
elini bu güc mərkəzindən uzaq tutur. Soykökünə çox yaxın olan Xəzərinsə bu
dövrdə məqsədi qardaşı ilə birləşmək, qorumaq-filan deyil, yağmalamaq və qənimət
əldə etməkdir...
Və
bölgəyə İslam adlı özü yeni, kökü isə qədim bir inanc ayaq basır. Onun xristian
Bizansını belə təlaşa salan ayaq səsləri ən qısa vaxtda Dəmirqapı Dərbəndin o
biri üzündə eşidilir. Dörd əsr istilaçının atəş dininə “bə çeşm” deməyən isəvi
Alpanlar seçim zamanının gəldiyini görüb İsa inancını da öz içinə almış İslamla
yaxından tanış olur. Rəsmi tarix bu dövrlə bağlı bir sürü “nağıl toxuyur” –
işğal etdilər, qırıb-çatdılar, təcavüz etdilər, çapıb-taladılar, sonra da öz
dinlərini zorla qəbul etdirdilər deyə (400 ilin Sasanisi nə əcəbsə bunları bir
arada və bu qədər asan edə bilməmişdi)... Tariximizin bu döngəsinə boylanmaq
üçün biz rəsmilikdən uzaq, sadə dilə üstünlük verək.
İsəvi
Alpanların böyük bir qismi, eləcə də, onlarla birlikdə yaşayan digər azsaylı
xalqların əksəri mötədil İslamı qəbul edərək müsəlmanlaşır və bununla özünü üç
qonşudan – riyakar Bizansdan, yağmaçı Xəzərdən və istilaçı farsdan qorumağı qərara
alır. Alpanların kiçik bir hissəsi isə İslamdansa İsa inancında qalmağı üstün
tutur, Ərsak dağlarındakı monastırlarına çəkilir. Dində məcburiyyət yoxdur.
Lakin din fərqi artıq onlara öz soydaşları olan əksəriyyətin xeyrində-şərində
iştirak etməyə, toplumun digər hissəsi ilə əvvəlki kimi bir olmağa əngəldir. “Ərməni”
kəlməsinin dini kimliyə büründüyü, tarixin bu qırılma nöqtəsində çoxsaylı müsəlman
Alpanlarsa “əski dində” qalan qardaşından, əmiuşağından ayrı düşmək, onlarla
qohumluq və qan bağını itirmək istəmir. Sayları az, özləri təcrid olmanın
astanasında. Bir də xristian Bizansının bölgəyə öz təbəəsi kimi soxuşdurmağa
çalışdığı “qara donlu”, döşü xaçlı fürsətçi haylar var artıq “səhnənin” o biri
küncündə. Bir ovuc isəvi Alpanı tezbazar “qriqoryanlaşdırmaq” yolu ilə bölgədə
özünə yer eləməyə həvəsli haylar. Müsəlman Alpan öz doğma soydaşını bu “qara
donlulara” göz görə-görə necə yem eləsin? Din ayrıdırsa, Soy birdir, kök
birdir, vətən birdir...
Kirvəlik
məhz bu nöqtədə ortaya çıxır. Müsəlman Alpanlar öz isəvi soydaşlarının əlindən
tutub onu “sünnət” etdirdiyi oğlunun, nəvəsinin yığnağına gətirir, evinin
qapılarını onun üzünə yenidən taybatay açır, ona həmin vaxtadək görünməmiş bir
görəv verərək kirvə seçir. Müsəlman olmuş soydaşının övladının “kirvəsi” seçilməklə
etnik bağları qoruyub-saxlamağa razılıq verən Qarabağın isəvi Alpanları o dövrdən
başlayaraq əsrlər boyu özü müsəlman olmadığı halda, müsəlman Alpanın övladının
“sünnət” mərasimində ən hörmətli və toxunulmaz qonağa çevrilir. “Kirvə
qardaşdan yaxındır”, “kirvə kirvədən qız belə almaz”, “kirvəlik yükü ağırdır”,
“kirvə kirvənin damına çıxmaz ki, evinə toz qonar” deyimləri xalqın tarixi
yaddaşından süzülüb bu günümüzə kimi adlayır və ta ki qara əllər bölgədə hay
kimliyini yerləşdirdiyi günə qədər bu düşüncə, bu adət, bu dəyər dinə görə ayrı
düşən bir xalqın soy birliyinin simvoluna çevrilir...
Tarixdə
Kirvəliyin başlanğıc nöqtəsi bu. Bizimlə eyni tarixi, eyni vətəni, eyni aqibəti
bölüşən digər bölgə xalqları özündə qardaşlığı, sədaqəti və əbədi dostluğu əks
etdirən bu tarixi gələnəyimizi bəşəri bir dəyər kimi mənimsədilər...
Bu
gün bölgədə at izinin it izinə qarışdığı dövrdə kirvəliyin tarixi mahiyyətini
anlamaq elə də asan deyil.
Cəmisi
bir əsr yarım öncə “ərməni” deyib yaxın bildiyimiz Qarabağ alpanları bu gün
imperializmin qulbeçəsi olan qriqoryan hayların girovunda olmaqla bizə qarşı cəbhədə
görünür.
Tarixi
vətənimiz səkkiz tikəyə bölünmüş halda, inancımız müxtəlif saxta məzhəb
doqmaları ilə təhrif edilmiş durumda (zatən inanc əvvəlindən insanları birləşdirən,
din və məzhəblərsə ayıran missiyanı yerinə yetirib), bölgənin siması bütünlüklə
və müxtəlif istiqamətlərdə dəyişilmək yolunda.
Kirvəliksə
bizimlə bir yerdə öz mövcudiyyətini sürdürməkdə davam edir, xalqımızın tarixi
yaddaşında özünü qoruyub hifz edir.
Kirvəlik
yükü ağırdır. Bizlər yenə “sünnət” etdirmək istədiyi övladımıza kirvə tutur, bu
yükü nəsildən-nəslə ötürürük. Kirvə
qismində isə artıq Qarabağın isəvi Alpanları iştirak etmir. Onları bizdən həmin
“qara donlu” qriqoryan-hay keşişləri çəkib alaraq, öz “qazanlarında” əritməkdədir.
Hər
şeyin öz qəlibini dəyişdiyi, öz gerçəyini gizlədiyi bu dönəmdə insanlığa xidmət
edən, bizi Biz edən milli-tarixi dəyərlərimizi, adət-ənənələrimizi qorumaqda
israrlıyıqsa, bu dəyərlərin və gələnəklərin tarixi keçmişini bilməli, olduğu
kimi görməliyik.
01.09.2018.
Комментариев нет:
Отправить комментарий